हे गाणं मी तुझ्याकडुन शिकलो

आपलं जे असतं, ते आपलं असतं,

आपलं जे नसतं,ते आपलं नसतं !

हसतं डोळे पुसुन, आतुन फळासारखं पीकलो;

हे गाणं मी तुझ्याकडुन शिकलो !

आलेला मोहोर,कधी जळुन जातो,

फुलांचा बहर, कधी गळुन जातो !

पुन्हा प्रवास सुरु केला

जरी चालुन थकलो;

हे गाणं मी तुझ्याकडुन शिकलो !

कधी आपलं गावसुद्धा, आपलं नसतं,

कधी आपलं नावसुद्धा,आपलं नसतं !

अशा परक्या प्रदेशात

वाट नाही चुकलो;

हे गाणं मी तुझ्याकडुन शिकलो !

पिंज-यात कोंडुन, पाखरं आपली होत नाहीत,

हात बांधुन, हात गुंफले जात नाहीत

हे मला कळलं तेंव्हा

हरुन सुध्दा जींकलो;

हे गाणं मी तुझ्याकडुन शिकलो !

झाड मुकं दिसलं तरी, गात असतं,

न दिसणा-या पावसात,मन न्हात असतं !

काळोखावर चांदण्याची

वेल होऊन झुकलो;

 हे गाणं मी तुझ्याकडुन शिकलो !