मकर संक्रांत २०२३ , दाने, शुभाशुभ फले, पर्वकाळ, संपूर्ण माहिती

 मकर संक्रांत २०२३ 🌹

शके १९४४  , पौष कृ सप्तमी , शनिवार १४ जानेवारी २०२३  रोजी रात्री ८:४४ वा. सूर्य मकर राशीत प्रवेश करत आहे . त्यामुळे या वर्षी संक्रांत रविवार १५ जानेवारी रोजी सूर्योदयापासून सूर्यास्तापर्यंत आहे . संक्रांत बालव करणावर असून वाहन वाघ आहे व उपवाहन घोडा आहे . तिने पिवळे वस्त्र धारण केले असून हातात गदा घेतलेली आहे . केशराचा टिळा लावलेला आहे . वयाने कुमारी असून बसलेली आहे . वासासाठी जाईचे फूल घेतलेले आहे व पायस म्हणजे खीर भक्षण करत आहे . सर्प जाती आहे . भूषणार्थ मोती धारण केले आहे वारनाव राक्षसी असून नाक्षत्र नाव मंदाकिनी असून समुदाय मुहूर्त ३० आहेत . दक्षिणेकडून उत्तरेकडे जात असून ईशान्येकडे पहात आहे . संक्रांति ज्या दिशेकडून येते त्या दिशेकडील लोकांना सुख प्राप्त होते व ज्या दिशेकडे जाते त्या दिशेकडील लोकांना दुःख व क्लेश होतात . संक्रांति पर्वकाळात स्नान , दानधर्म ,  नामस्मरण असे पुण्य कृत्य केले असता फल शतपट होते . पर्व काळात दात घासणे , कठोर बोलणे , वृक्ष ,  गवत तोडणे , गाई म्हशींची धार काढणे व कामविषय सेवन ही कामे करू नयेत .

संक्रांति पर्व काळात स्त्रीयांनी करावयाची दाने

देश काल कथन करून 

" मम्  आत्मन: सकल पुराणोक्त फल  प्राप्तर्थ्य श्री सवितृ प्रीतीद्वारा सकल पापक्षय पूर्वकं स्थिर सौभाग्य कुलाभिवृद्धी धनधान्य समृद्धी दीर्घायु महेश्वर्य मंगलाभ्युदय सुख संपदादि कल्पोक्त फल सिद्धये अस्मिन मकरसंक्रमण पुण्यकाले ब्राह्मणाय ( अमुक ) दानं करिष्ये "

 असा संकल्प करून दान वस्तूचे व ब्राह्मणांचे पूजन करून दान द्यावे व दक्षिणा द्यावी .

पर्व काळातील करावयाची दाने

 नवे भांडे , गाईला घास , अन्न , तीळपात्र , गुळ , सोने ,  भूमी , गाय , वस्त्र ,  घोडा , इत्यादी यथाशक्ती दान करावे .

जन्मनक्षत्रा वरून संक्रांतीची शुभाशुभ फले

१) हस्त , चित्रा , स्वाती :- प्रवास .

२) अनुराधा ,  विशाखा ,  ज्येष्ठा , मूळ , पूर्वाषाढा , उत्तराषाढा :- सुख , सौख्य . 

३) श्रवण , धनिष्ठा , शततारका :- रोग - आजार .

४) पूर्वाभाद्रपदा , उत्तराभाद्रपदा , रेवती , अश्विनी , भरणी , कृतिका :- वस्त्र लाभ .

 

५) रोहिणी , मृग , आर्द्रा :-  नुकसान .

६) पुनर्वसू , पुष्य , आश्लेषा , मघा ,  पूर्वा , उत्तरा :- उत्तम द्रव्य लाभ .

संक्रांतीचा पर्वकाळ १५  जानेवारी रविवार सूर्योदयापासून  सूर्यास्तापर्यंत आहे .

या दिवशी तिळाचे उटणे अंगास लावणे , तिलमिश्रित उदकाने स्नान , तिलहोम ,  तिलतर्पण , तिलभक्षण ,  तिलदान केले असता सर्व पापांचा नाश होतो .

दरवर्षी मकर संक्राती संदर्भात , ही संक्रांत अशुभ आहे अशा प्रकारच्या वेगवेगळ्या अफवा पसरवल्या जातात व लोकांना घाबरवण्याचा प्रयत्न केला जातो . अशा प्रकारच्या गोष्टींना कोणताही शास्त्रीय आधार नसतो . त्यामुळे त्या अफवांवर लोकांनी विश्वास ठेवू नये.

( आभार - दाते पंचांग )

- अशोककाका कुलकर्णी