ह्रदयस्पर्शी चारोळ्या

वळवाच्या पावसाकडून
कधी गुन्हा घडायचाच
रपरपणाऱ्या सरींनी
रानात धुरळा उडायचाच

- महादेव बुरुटे, शेगाव (जत, सांगली) 

------------------------------------------------------------

जे सरून गेले, ते दिवस

आणि उरली ती आठवण

तुझ्याविना माझं जीवन

म्हणजे दुःखाचीच साठवण

- प्रा. शरद गायकवाड, येणेगुर (ता. उमरगा)

------------------------------------------------------------

क्षणभराची भेट तुझी
त्यात खूप काही बोलणं
कसं शक्‍य आहे
असंख्य चांदण्या मोजणं? 

- महादेव कोरे, पुणे 

------------------------------------------------------------

प्रेमात पडलं की

मनाला होते जखम

तिचं हसणं हेच

या जखमेवरचे मलम

- दीपक राखुंडे, सुखापुरी (अंबड)

------------------------------------------------------------

तू हळव्या मनात माझ्या

सळसळते पिंपळपान

प्रेमाचे हिरवे नाते

नखशिखान्त सुंदर, छान

- रा. वि. शिशुपाल, पारगाव (दौंड)

------------------------------------------------------------

चंद्राच्या साक्षीनं दिलेलं वचन

जेव्हा तू मोडलं

तेव्हापासून चांदण्यात

जाणं मी सोडलं

- किरण दशमुखे, सटाणा (नाशिक)

------------------------------------------------------------

ओल्या मातीचा गंध

जसा पावसाच्या पाण्यात

तसाच तुझ्या अस्तित्वाचा

गंध मनाच्या गाभाऱ्यात

- भाग्यश्री राजे, पुणे 

------------------------------------------------------------

तू माझी आहेस म्हणून

किती बरं वाटतं मला

नाहीतर हे जग म्हणजे

जसं खायला उठतं मला

- विलास पिंगळे, पाबळ (शिरूर, पुणे) 

------------------------------------------------------------

प्रेम कुठे शोधतोस तू

प्रेम नसते दहा दिशांत

पैसा पैसा जप वेड्या

प्रेम असते भरल्या खिशात !

- विजयकुमार निलंगेकर, बीड

------------------------------------------------------------

काट्यांचं प्रेम असतं गुलाबावर

म्हणून तोडणाऱ्याला ते टोचत असतात

पण काटे बाजूला केले जाताना

गुलाब का शांत बसतात?

- संदीप निकम, धाड (बुलडाणा) 

------------------------------------------------------------

प्रेम असते प्रेमासारखेच पवित्र
मनोमंदिरात ते पूजायचे असते
आज जडले आणि उद्या उडाले
असे कधीच ते उथळ नसते

- वैशाली टिकेकर, देवरुख (रत्नागिरी)

------------------------------------------------------------
मी आठवायचं, तू विसरायचं
मी विसरायचं, तू आठवायचं
असं घडत गेलं तरीही
मन एकमेकांकडं पाठवायचं

- हेमंत कुलकर्णी, नारायणगाव (पुणे)

------------------------------------------------------------

आयुष्याच्या हिरवळीचं
नाव असतं युवा
संग्रामातील वीर अन्‌
तिमिरामधला दिवा

- स्वप्नील इंगोले, मोरगाव (काकड), (अकोला)

------------------------------------------------------------

तुझ्या-माझ्या आयुष्यातील गुपित
ठेवलंय मी माझ्या हृदयाच्या कुपीत
पण विचारतात सारे खोदून खोदून
काय करायचंय ते त्यांना शोधून ?

- विलास देशमुख, खेड (सातारा)

------------------------------------------------------------

रानातला रस्ता
संपून जातो श्‍वासा-भासात
तू हवायस म्हणून सांगतात
दिशा दिशा भासात

- डॉ. शीतल हिरेमठ, गोडोली (सातारा)

------------------------------------------------------------

दिसलीस रस्त्यात कधी तर
अनोळखी बनून जातेस निघून
पण मुकी तुझी नजर मला
नाते जुने जाते सांगून

- नंदकुमार येवले, (पुणे) 
 ------------------------------------------------------------
नशीब माझं उजळलं
सहज जेव्हा दिसलीस
पुनवचांदणं उधळलं
गोड जेव्हा हसलीस

- पुंडलिक गारुळे, नागपूर
------------------------------------------------------------

केशसंभारावर करू कविता
की गालांवर लिहू गीत?
सांग सुंदरी! कोणत्या तऱ्हेने
व्यक्त करू मी प्रीत ?

- वैभव कुलकर्णी, जालना
------------------------------------------------------------

तुला विसरल्याचं नाटक करणं
मला खरंच जमत नाही
म्हणून तर तुझ्या गावात
माझं मन रमत नाही

- शिवाजी घुगे, हगोली
------------------------------------------------------------

काय पाहिलं तुझ्यात
अन्‌ प्रेमात मी पडलो
हृदय तुला दिलं
मी एकटाच उरलो

- नितीन चौधरी, परळी वैजनाथ
------------------------------------------------------------

तुझ्या-माझ्या प्रेमाचे
शब्दच आहेत साक्षीदार
नाजूक आपल्या प्रेमातील
प्रत्येक गोष्ट नक्षीदार

- उदय कांबळे, शिरोली  
------------------------------------------------------------